Veterarankøyretøy-opptog og -utstilling.
Vi i ASG har fått følgande referat frå initiativstakar Jarl Audun Rivedal:
Innslaget med veterankøyretøy-opptog og -utstilling under årets Skjærgårdstreff, vart ein kjempesuksess etter publikum sine reaksjonar å døme. Eg har berre fått lovord i ettertid, og folk spør om dette kan verte årevist, evt. annan kvart år?
Eg er overvelda og rørt over mottakelsen dette innslaget fekk. Eg vil helst ikkje skryte sjølv, men på spørsmål om å skrive litt i etterkant, kan eg nemne nokre av publikum sine utsegner; "Dette var ein innertiar", "Dette må vi ha meir av!" og "Dette var kjekt!". Ein svenske på ferie i Askvoll; "dette va jättebra!"
Også deltakarane likte seg, og ein eldre kar med tohjulstraktor uttrykte fylgjande etter å ha køyrt gjennom folkemengda i sentrum; "Me følte oss som kongar".
Totalt deltok 66 køyretøy, og det er langt over målet mitt på 50. Heilt fantastisk, og det føltes godt no etter at all jobbinga med brev og telefonar. Det einaste negative no kan bli telefonrekninga som kjem, men når resultatet vart so bra, lyt eg berre gløyme den :)
Deltakarane kom frå Askvoll, Sunnfjord, Nordfjord og Sogn, samt ein frå Tyristrand på ferie i distriktet. Sunnfjord Veteranvognklubb stilte med over halvparten av køyretøya, men nesten like mange lokale aktørar kom på bana med ei herleg blanding av forskjellige køyretøy.
Kaffi, kaker og brus ved startområdet ved Askvoll skule, fall i god smak,. Og deltakarane kosa seg og vart betre kjende med kvarandre. Eg ser sjølvsagt i ettertid at detaljar i gjennomføringa kunne vore gjort betre, og det vart litt hektisk føre start pga. det store deltakarantallet. Ei stund frykta eg at det ikkje skulle verte plass på kaiområdet, men dei som stua køyretøya der, gjorde ein kjempejobb. Heilt topp!!
Utifrå at dette var nytt i Askvoll, både for publikum og oss som gjennomførte det, er eg kjempegodt fornøgd. Intensjonen min var å få folk til å ta vare på, og gjerne pusse opp, eldre køyretøy. Desse køyretøya vil so kunne bli til glede for mange, og for ettertida vil dei auke i verdi og vere kulturhistorie.
Eg må berre få takke ASG (Askvoll Sentrumsgruppe) for at eg fekk sette denne ideen ut i livet, og ellers so takkar eg alle som har støtta opp med køyretøy og dei som har hjelpt til med å få arrangementet praktisk gjennomført. Der vil eg spesielt nemne Askvoll Lensmannskontor som var generøse og viktige i å få opptoget praktisk gjennomført.
Hjartelag takk alle saman!! So får tida vise om me kan få til meir når det gjeld veterankøyretøy i Askvoll. For meg vart dette ei kjempeoppleving eg alltid vil hugse.
